REFLESAUN LELO-LELON NIN-7

[Ton ba, hulan ba.. enek tini gau hali lai mia lei…]

*) Lalan lii mia lala ikliak, mas nodi gita kmeman wen rahik duké mia lala wai mas nodi na’o itobu seluk nin.

*) Gita sodi rabilinu itobu nehe gamain uluk ramau gita inhila gita tanis mia uma nia serin. Itobu ilan sia tini mia ralan, mia garen—komprende momour sobre esensia mamori gita itobu nin.

*) Se go ta nasa go sihit enek, ele la tini go bluri loos lala sia? Ele megan gita itobu mamori ni nanau. Se go ta nasa go garen enek, ele la tini go bluri nau lala sia mia mundu lei?

*) Gita anar sai ele etan babua seke gita matar-hulun. Sia ele gita raar. Sia tini oko ratutan gita lisan sai tema-tema.

REFLESAUN LELON-LELON NIN-6

[Kuaze ton nehe hali tini ga’u mai hali mia hatin nehe le,i oko kontinua espresa ga sentimentu no ga mamotus.. Heti waki lala sia nehe mai ga tui ilan bluri loe ga garek no ga huak…..]

*) Se go makat tasi gai, no go ta fiar la mia uma laluli, no matebian sia, ta mia lala nehe enek. Mas, go mablesu nai rea laluli nehe lei, inseke tini go moga rahik.

*) Gita tenki rotus nama, lelon mesu mia nahuk.

*) Se gau ta lua nama ga uk no ga amut, inseke ga mori lei helin taik.

*) Gau mui oko sir nama inar gain sia ilan, para rakuak rodi ramoras rarai sai.

*) Gtia lei un nehe manak, amut nehe manak ele itobu Timor ni anan. Gita itobu nehe. Ilan tini, gita tenki rakuak, radas, no sau gita rea nehe lei..

*) Se imorin naan ba uma mia hatin-hatin, inseke lalan li gita rodi we oko ramate imorin.

*) Aran heit no aran lait sira bua, ‘ilan ta bukan masin be meer megan, no us be panas megan. Ilan wawa..”

REFLESAUN LELON-LELON NIN-5

*) Gita anar sia be oko kontinua no gita inar no amar sia tradisaun. Se gita ta toga sia lalalan enek, ele la tini be ana sia roko bluri nuna bouk ilan?

REFLESAUN LELON-LELON NIN-4

*) Anar sia ele ai ni sanan. Gita inar no amar sia ele ai ni un. Ai ni un tenke nene nahatik we nadin, para ai ni sanan sia matak la nahatik.

*) Se go mui oko itobu seluk respeitu go, go tenke respeitu uluk sia.

REFLESAUN LELON-LELON NIN-3

*) Se gita ta mia huan waki enek, no gita ta totus wai, susar mai gita oko ne perdaun la mia gita sanalir sia inhila sia monu la mia sala.

RELESAUN LELON-LELON NIN-2

*) Gita saude ele osa mamea. Gita tenke kuidadu lala lalalan bouk ilan. Se taik, gita bee oko ramtaa saugati lala tema-tema.

REFLESAUN LELON-LELON NIN --1

[Ton ba, hulan ba, lelon wai rais demais lii ba.. Ga'u enek tini atualiza hali blog nehe lei. Ga'u enek tini mia hali vontade oko tui lala sia be ga'u otus no sinti.....]

*) Sentidu vida nin la tini oko mia tan, se gita ele itobu mamori ramta ba gita esperansa?

*) Lalan li gita ramnok se gita ta nau lala hain enek, duke gita ralebun, loe gita hahar, mais nahit iuk, gita ele megan itobu babodo sia.

*) Ele gita un, aran lait no aran heit sia limusan lei banas tarablihuk enek. Gita tenke kuidadu. Gita tenke tau nama limusan lalan sia ilan mia gita garen no huar se gita mui oko nene felisidade mia gita mori lelo-lelon nin.

*) Mestre Divinu, doi la tini go eskolla ga'u oko ablesu ele go eskolante nehe?

REFLESAUN SOBRE UKUN RAHIK NI DIRIN

1. Ukun rahik ni dirin gita rour no raan

2. Ukun rahik ni dirin gita rour no ruin natagar

3. Ukun rahik ni dirin, limusan laluli, limusan murak!

4. Ukun rahik ni dirin gita tane, gita sau rakuak!

5. Ukun rahik ni dirin rahoor gita tema-tema ele Timor anan!

6. Rakuak hita mi lelon nahuan!

7. Rakuak gita mi lelon lalain!

8. Rakuak gita mi, ralateha lelon mesu oko runa Timor-Leste dadi uma ralan nehe manak nahit rea nawen.

9. Gita uma ralan rai, gita tema-tema be oko sinti la'a ta lalan enek!

10. Rakuak gita hutu isar, rakuak gita sar rarai sia, nuna gita uma ralan moras!

Nosi Abé Barreto Soares
Dili, Lelon27, hulan Novembru, ton 2006

INTRODUSAUN

Sanalir sia, "blogspot" privadu nehe lei ganik rahik. Bouk lei ele etan babua seke ga ablihuk hatin mia mundu literariu nin. Ga'u mui oko konvida mi tema-tema oko rahere la'a mia rohalir sobre pensamentu no sentimentu sobre gita itobu ni mamori mia mundu rea klalan.

Dili, 22 Janeiru 2007

ABE BARRETO SOARES